euskalkultura.eus

Mar del Plata, Argentina. Mugimendu handiko egunak bizi izan dituzte uztailean Mar del Platako euskaldunek euren euskal etxearen 68. urtebetetzean. Hilabetean zehar, eta etxeko bazkide eta lagunen eskutik, honako egitaraua burutu da urtemuga berria ospatzeko:

-Uztailaren 12an: “68. urtemugako pilota txapelketa”, kategoria askotako partaideekin
-Uztailaren 14an:  “Todos de zurda” pilota txapelketa, Diego Iturrarte eta Gustavo Fernandez Arias; Tito Ferreira eta Iker Garay; Diego Suarez eta Marcelo Lentini;  Domingo Moyano eta Juan Jose Picabea bikoteekin
-Uztailaren 15ean: “68. urtemugako mus txapelketa” eta “68. urtemugako 'kanasta' txapelketa”
-Uztailaren 16an: Urtemugaren Afaria Handia
-Uztailaren 20an: “Lagunen pilota txapelketa”, Pueyrredon Kluba Denak Bat Euskal Etxearen kontra
-Uztailaren 23an: Euskal etxearen agirien erakusketa Jose de Ariztimuño liburutegian
-Uztailaren 27an:  “Lagunen pilota txapelketa”, errebantxa. Pilotarien laguntaldearen errekia, sari ematea

[Beti Alai taldeko neskak 68. Urtemuga Afarian dantzari (argazkia EE)]

Kirolak, historia, kartak, kultura baita dantzak eta janari ona ere euskal etxearen urtemugara bildu dira. Izan ere, urteurreneko afarian bertako Beti Alai dantza taldeko kideek -- txikiek, ertainek eta helduek-- dantza erakustaldi eder bat eskaini zieten Moreno kaleko egoitzara hurbildu ziren lagun guztiei, tartean erakundeko lehendakari ohiak, zuzendaritza batzordeko kideak eta makina bat betiko lagun.

Afariaren testuinguruan, Jose Martin Azarloza lehendakariak hitz batzuk zuzendu zizkion publikoari, euskal etxearen sorrera gogoratuz eta esker beroak emanez euskal etxea eraiki eta urteetan bizirik mantentzen lagundu zuten eta egun ere euren arnasa Denak Bati ekartzen dioten guztiei.

-Mar del Platako Euskal Etxearen webgunea: www.denakbat.org.ar