"Disappearing West" dokumentalean agertu nahi duten Oesteko euskaldunen ondorengoen bila ari dira

2014/03/13

"Disappearing West" dokumentaleko egileak Kalifornian, Nevadan, Arizonan eta Idahon izango dira elkarrizketak egiten

PUBLIZITATEA

Kaliforniako Bakersfield hiriko hiru zinemagile dokumentala egiten ari dira Ameriketako Oesteko euskaldunei buruz. "Disappearing West" izenburua du filmak eta Estatu Batuetako historiaren parte hau argitara ekarri nahi du, nahiko ezezaguna delako euskaldunen gizataldeetatik at. Beaux Mingus, Philippe Duhart eta Gina Napolitan dira lanaren zuzendariak. Une honetan euskaldunen ondorengoak elkarrizketatzen ari dira Kalifornian, eta aurki Nevada, Idaho eta Arizonan ere izango dira. Zuzendariek gonbitea luzatzen diete dokumentalean parte hartu eta euren familiaren historia kamara aurrean kontatu nahi duten euskaldunei.

Bakersfield, AEB. AEBetako euskaldunei buruzko dokumental baten grabazioa hasi du berriki Bakersfieldeko zinemagile talde batek. “Disappearing West” izenburua du lanak eta egileak Beaux Mingus, Philippe Duhart soziologia doktoregaia eta Gina Napolitan zinemagilea dira.

Hiruek ala hiruek uste dute Oesteko euskaldunei buruz istorio interesgarri asko gelditzen dela kontatzeko eta AEBetako alde honen garapenan egin zuten ekarpena nahiko ezaguna dela uste dute. Une honetan inguru horietako euskaldunei elkarrizketak egiten ari dira eta dokumentalean parte hartu eta euren senitartekoen historia kontatu nahi dutenei eurekin harremanetan jartzeko gonbitea luzatzen diete. Horretarako, idatzi basquedocumentary@gmail.com e-mailera.

Hiruetatik Duhart bakarrik da euskal jatorriduna: ama 1970an heldu zen AEBetara Ortzaizetik eta aita 1967an Makeatik. Halarik ere, hiruek sentitzen dute AEBetako euskal kultura gorde eta ezagutzera emateko erantzunkizuna, EuskalKultura.com-i agertu diotenez.

Film honekin euskaldunek AEBetako Oestearekin duten harremanaren ikuspegi sakonagoa agertu nahi dute, bai historikoki zein gaur egungo testuinguruan. Dokumentalak, besteak beste, etxea eta komunitatea kontzeptuen inguruko hausnarketa egingo du.

Pelikularen oinarria Bakersfield izango da, baina zuzendariek elkarrizketak egingo dituzte ere Nevadan, Idahon eta Arizonan. Lana datorren urtean amaituko dutela espero dute eta zinemaldietan, euskal etxeetan eta Oesteko kulturguneetan izango da ikusgai, besteak beste.