euskalkultura.eus

Coronel Pringles, Argentina. Coronel Pringles-ko Eusko Biltzar-ek gure erredakziora bidalitako oharrean azaltzen denez, euskal elkartea herrian "urte askotan biltzen pasa ondoren" jaio zen, "hasieran euren Euskal Aberritik etorritako euskaldunak ziren, hemen finkatu eta familia sortu zutenak, beren ondorengoei ohitura eta tradizioak pasatzen zietenak, tartean 'emandako hitza'ren balioa, zintzotasuna, apur bat saiatu edo 'temati' izatearen fama zeukaten; azkenean, 1990eko abuztuaren 3an, duela honez gero 23 urte, Eusko Biltzar Euskal Etxea elkartea sortu zen".

Euskal Etxearen urteurren berria behar bezala ospatzeko eta gainerako herritarrekin euskal kultura eta historiaren osagai edo momentu garrantzitsuenak elkarbanatzeko, Euskal Etxearen Zuzendaritza Batzordeak deliberatu zuen Pringlesentzat "Gernikaren Bonbardaketa - 75. urteurrena" erakusketa ibiltaria data hauetarako eskatzea haren ekoizlea den Eusko Jaurlaritzari, FEVA lankide Argentinako hainbat etxetan itzulia egin duena iaz Gernikako sarraskiaren 75. urteurrena bete zenetik.

Erakusketa, beraz, gaur arratsaldean inauguratuko da Coronel Pringlesen, arratsaldeko zazpietan Cabrera 459an, Kultura Institutuan. Eusko Biltzarrek gonbidapena luzatu nahi die bazkide, lagun eta herritarrei oro har erakusketa bisita dezaten: larunbat eta igandean (abuztuaren 3 eta 4an), arratsaldeko seietatik hamarrak arte; eta astelehenetik ostiralera (5etik 9ra), goizeko 10etatik 12ak arte, eta arratsaldeko ordu bietatik lauak arte. Eskolentzat eta publiko orokorrarentzat ere zabalik dago.