euskalkultura.eus

Chacabuco, Argentina. Urte berezia izango da aurtengoa Buenos Aires probintziako Chacabuco hiriko Guillermo Larregui Euskal Etxearentzat. 25 urte beteko ditu erakundeak datorren ekainaren 20an eta urtemuga ospatze aldera programa oparo bat ari dira garatzen. Egitaraua urte osoan zehar burutuko da eta gauzatuko diren ekintzen artean tabernak eta beste euskal etxeek antolatutako partaidetza aipa daitezke. Baina dudarik gabe, ekainaren 19ko urteurreneko afaria –egun bat aurreratuko dute jaia, 20a Argentinan jai eguna delako– eta abuztuaren 8ko Dantzari Topaketa izango dira ekitaldi nagusiak.

Afaria euskal etxeko egoitzan izango da eta berrehundik gora laguni luzatuko zaie gonbitea, tartean, Sara Pagola Ordezkariari, FEVAko agintariei eta euskal etxeetako kideei. Abuztuaren 9koa, berriz, batez ere gazteei zuzendutako ekitaldia izango da. Topaketa arratsaldeko 5ak aldera hasiko da herriko plazan egingo den dantza erakustaldiarekin eta talde parte-hartzaile guztiek dantza egin ondoren, euskal etxean bilduko dira erromeriaz gozatzera.

Etxeko lehendakari Pablo Pavesak EuskalKultura.com-i azaldu dionez, dantzarien ostatua Udalaren gune batean izango da, eta horren ondorioz musu truke eskainiko zaie. Kari horretara ez da voucherrik egongo eta pertsona bakoitzak bere otorduak eta bidaiaren kostua baino ez ditu ordaindu behar izango. Halaber iragarri du Buenos Airesko Nafar Etxeko dantzariak izango direla jaialdian aurkeztuko den taldeetako bat. Proposamena irekia da eta parte hartu nahi dutenek euskal etxearekin behar dute harremandu. Chacabucoko Guillermo Larregui Euskal Etxea Facebook-en dago, Centro Vasco Chacabuco izenpean. Helbide elektronikoa, berriz, cvchacabuco@yahoo.com.ar dute.