euskalkultura.eus

euskal diaspora eta kultura

Albisteak rss

Cañuelaseko Denak Bat-ek apirilaren 14 eta 15era aldatu du Dantzarien Aberri Eguneko VI. Elkarretaratzea

2012/03/09

Dantzariak Cañuelaseko kaleetan dantzari bertako euskal etxeak arrakasta handiz urtero antolatzen duen Aberri Eguneko Dantzarien Elkarretaratzearen aurreko edizio batean (argazkia EuskalKultura.com)
Dantzariak Cañuelaseko kaleetan dantzari bertako euskal etxeak arrakasta handiz urtero antolatzen duen Aberri Eguneko Dantzarien Elkarretaratzearen aurreko edizio batean (argazkia EuskalKultura.com)

PUBLIZITATEA

Cañuelaseko Euskal Etxeak urtero Aberri Eguna ospatzeko antolatzen duen Dantzarien Elkarretaratzea Argentinako euskal egutegian marra gorriz markatuta dagoen horietakoa da, hitzordu garrantzitsua bilakatu baita azken urteotan herrialde honetako hainbat euskal etxetako dantzari batez ere gazteentzat. Seigarren edizioa du aurtengoa eta, lehenengo deian, martxoaren 31 eta apirilaren 1eko astebururako iragarri bazen ere, euskal etxe antolatzailetik atzo adierazi zutenez, apirilaren 14 eta 15era pasatu da azkenean, "ostatatzeko kontuak medio, horretarako erabili ohi dituzten Smata-ko instalazioak hasieran aipatutako datetan ez baitira egoki erabiltzeko moduan egongo".

Cañuelas, Argentina. Atzo bertan antolatzaileetakoa den Margarita Mathieu-k EuskalKultura.com baieztatu zionez, Aberri Eguneko VI. Dantzarien Elkarretaratzeak ez du bestela, egitarauari dagokionez, aldaketarik izango, data salbu. Beraz, eta gure irakurleen oroigarri, otsailaren 22an argitara eman genuen oharra ekarri dugu lerro hauetara, zer edo zer egokituta.

Cañuelasekoa ezinbesteko hitzordua bilakatu da azken urteotan Buenos Aires probintziako eta urrunagoko hainbat dantzari eta dantza taldeentzat. Izan ere, ehunka dantzari dira urtero Cañuelasen biltzen direnak, bertoko euskal etxeak gonbidaturik. Topaketa bertako euskal erakundeak Aberri Eguna ospatzeko egiten dituen ekitaldien barne dago, erromeria eta igandeko bazkariarekin batera. 

Aurten ere --baina orain apirilaren 14ean, larunbata, eta 15ean, igandea--, larunbat goizean hasiko dira biltzen neska-mutilak Smata-ko instalazioetan eta bazkaldu ondoren, arratsaldeko 5ak aldera euskal etxera abiatuko dira 6:30etan kalejirarekin hasteko. Dantza eginez eta abestuz helduko dira San Martin Plazara eta bertan prest egongo den oholtza gainean izango da dantzarien emanaldia. Ikuskizuna bukatzean, erromeria ospatuko da bertatik hurbil den euskal etxeko egoitzan. Ohi bezala, Argentinako beste leku batzuetatik helduta parte hartuko duten dantzari eta delegazioen ostatua Smata-ko instalazioetan izango da eta jaia igande eguerdian, eta erreki batekin bukatuko da. 

Vaucherren prezioari dagokionez --larunbateko bazkari eta erromeria, ostatua, eta igandeko gosari eta bazkaria-- aurten 230 pesokoa izango da dantzari eta taldeetako zuzendarientzat (gehienez bi zuzendari) eta 250 pesokoa laguntzaileentzat.

-Informazio gehiagorako edo izena emateko, helbide hauetako batera idatzi: margaita18@yahoo.com.ar edp vetcanuelas@yahoo.com.ar

 



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia