Boiseko kaleetan Santa Ageda eskean kantari ibili ziren hiriko euskara ikasleak

2014/02/06

Boiseko Euskal Museoan Santa Agedaren kantua entsaiatzen (argazkia Itxaso Cayero)

PUBLIZITATEA

Iragan otsailaren 3an Boiseko euskara ikasleak kalera kantuan atera ziren, Santa Agedaren tradizioari jarraiki. Ohitura bihurtu da Boiseko euskaldunen artean santa eskean ateratzea, beti ere euskara klaseetako ikasle eta irakasleen ekimenari esker. Taldera bildu ziren ere hiriko zenbait euskaldun eta ez euskaldunak ere; izan ere, euskaraz ez zekitenentzat kantuen letrak liburuxka batean bilduta banatu zituzten antolatzaileek. Giroa aparta izan zen eta Idahoko negu gorriari aurre egiteko gogoa eta kantuak jarri zituzten bertara bildu zirenek.

Boise, AEB. Otsailaren 3an ospatu zuten Santa Ageda boisetarrek, Izaskun Kortazar eta Itxaso Cayero euskara irakasleek EuskalKultura.com-i agertu diotenez. Ohi baino egun bat lehenago ospatzearen arrazoia zera zen, astelehenetan Boiseko Euskal Museoan ematen diren euskara klaseak eta ikasleak biltzeko egun aproposena zela. Beraiez gain, Boise aldeko euskaldun asko animatu ziren parte hartzera.

Boise Santa Ageda 2014 1

[Boiseko hotzari aurren egiteko txapelak jantzi zituzten batzuk (argazkia ICayero)]

Boise Santa Ageda 2014 2

[Beste batzuek euskal jantzi tradizionala jantzi zuten (argazkia ICayero)]

"Gaueko zazpiretan bildu ginen, guztira 23 lagun, euskaldunak eta ez euskaldunak", agertu dute antolatzaileek. Santa Agedaren abestia ikasi zuten eta irakasleek letraren esanahia azaldu zuten. Ondoren, entsegu pare bat, kantuan aurrena eta makila eta guzti gero.

Museotik atera eta taldea Boiseko Basque Block kalean barrena abiatu zen, boisetarrei kantatzeko prest. Leku Ona jatetxean gogoz abestu zuten, eta hango bezeroek jakinmina agertu zuten kantuari eta euskal tradizio honi buruz. Kantarik kaleko hotzari aurre egiteko gogo aparta agertu zuten eta kantaldiko giroa beroa eta atsegina izan zen.

Boise Santa Ageda 2014 3