euskalkultura.eus

euskal diaspora eta kultura

Albisteak rss

Bodarin ikusgarriak 250 bat ikusle bildu zituen Bordelen, Euskal Etxeak antolatutako ekitaldian

2011/12/06

Anaigazteak konpainiak Bordelen eskaini zuen 'Bodarin' ikuskizunaren une bat (argazkia BordeleEE)
Anaigazteak konpainiak Bordelen eskaini zuen 'Bodarin' ikuskizunaren une bat (argazkia BordeleEE)

PUBLIZITATEA

Eskualdunen Biltzarra Euskal Etxeak Anaigazteak dantza konpainia lapurtarraren Bodarin ikuskizuna ekarri zuen Bordelera iragan azaroaren 26ean, eta lagun asko bildu ziren bertara dantza eta flamenko fusio berezi hau ikusteko. Euskal Etxeko arduradunek adierazi dutenez 250 bat ikusle inguratu ziren eta, bukaeran emandako txaloen arabera, "oso gustukoa" izan zuten. ElkarteaK, bestalde, Euskararen Eguna ospatu zuen iragan asteburuan, Battittu Coyos eta Aurelia Arkotxa euskaltzainek eman zituzten hitzaldiekin eta kalean egin zen irakurketa publiko batekin.

Bordele, Frantzia. Arrakastatsua izan zen Anaigazteak konpainiak Bordelen eskainitako ikuskizuna. Eskualdunen Biltzarra elkarteak EuskalKultura.com-i azaldu dionez, 250 bat ikusle bildu ziren iragan azaroaren 26ean Bordeleko L'Entrepot antzokira, Cristian Larralde dantzariak eta Maiana Coronado flamenko koreografoak sortu duten ikuskizunaz gozatzeko prest. "Ikusgarrian eta bukaeran emandako txaloen araberan, bai eta ere ondoren izan ginituen komentarioen arabera, erran daiteke ikusleei izigarri gustatu zitzaiela", agertu du Euskal Etxeko lehendakari den David Mugicak.

Emanaldiaren ondoren afaria egin zuten bai ikusleek eta baita Anaigazteakeko dantzariek ere, Haillango Euskal Pilota elkarteak antolatuta. Giro bikaina sortu zen bertan, Les Saltim'bask taldeak alaitua (Haillaneko Asociation de Pelote Basque elkarteko animazio taldea da Les Saltim'bask).

Bodarin Bordelen 2011

[Flamenko dantzariak Bodarin ikusgarrian (argazkia BordeleEE)]

Euskararen Eguna kalean

Iragan asteburuan, aldiz, Euskararen Nazioarteko Eguna ospatu zuen elkarteak. Ostiralean Battittu Coyos euskaltzainak "Euskararen egoera Ipar Euskal Herrian eta oraiko hizkuntza politika" hitzaldia eman zuen euskal etxean. Ondotik, debatea eta zintzur-bustitzea egin ziren. 

Bordele Euskararen Eguna 2011

[Battittu Coyos euskaltzaina Bordeleko Euskal Etxean eman hitzaldian (argazkia BordeleEE)]

Larunbatean, aldiz, euskara Bordeleko kaleetara atera zuen elkarteak. Arratsaldeko lauetan pasa-kalea egin zen Euskal Etxetik Camille Julian plazaraino, elkarteko Gau Eskola eta Etxeko Soinuak taldeek alaitua. Gero irakurketa publikoa egin zen plazan.

Ondoren, euskal etxean, bueltan Aurelia Arkotxa poeta eta euskaltzainburuordeak hitzaldia eman zuen Bernat d’Etxepare, 1545ean 'Linguae Vasconum Primitiae', euskaraz argitara eman zen lehenengo liburuaren egileari buruz.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia