euskalkultura.eus

Carmen de Patagones, Argentina. Urtero ospatzen da Buenos Aires probintziako Carmen de Patagones herrian "Patagoniaren Burujabetza Jaia" (Fiesta de la soberanía patagónica) izeneko ekitaldia . Ekitaldiak helburu zehatza dauka: 1827. urteko martxoaren 7an Brasilen aurka eta hiria defendatzeko burututako bataila eta garaipena gogora ekartzea.

Milaka lagun bertaratu ziren festagunera efemeridearen 187. urteurrenean. Eta beste horrenbestek osatu zuten jaialdiaren programa. Izan ere, nazio mailako artistek –tartean, Victor Heredia, Chaqueño Palavecino eta Los Tekis Taldea, batzuk aipatzearren–, erakundeek eta kolektibitateen ordezkariek bat egin zuten ikuskizun ederrak eskaini ahal izateko.

[Jantziaz baliaturik, euskal irudiak ekarri zituzten euskal etxeko gazteek kabalkadara (argazkiaEE)]

Aurreko edizioetan bezala, Beti Aurrera Aberri Etxea elkarteko kideek izan zuten euskal gizataldea ordezkatzeko ardura eta ohorea. Eta ondo baino hobeto egin zuten, ikurrina eskuan eta euskal jantziz jantzita, martxoaren 7an egindako desfilean. Bidean, gainera, euskal etxeko neskek euskal dantza tipikoen pauso batzuk egiteko aukera ere izan zuten. Gogora dezagun Beti Aurrera Aberri Etxea euskal etxeak Argentinako bi herrietako euskal ondorengoak biltzen dituela: Rio Negro probintziako Viedma herrikoak eta Buenos Aires probintziako Carmen de Patagonesekoak.

"Patagoniaren Burujabetza Jaia"rekin batera, 2014ko ekintzen programari ekin zioten Beti Aurrera Aberri Etxea-ko kideek. Hurrengo aktibitatea ikasturte hasiera izango da, datorren asteazkenean. Euskara klaseak asteazkenero izango dira, arratsaldeko 3:30etatik 5etara eta 5etatik 7:30etara Delia Beatriz Etchegaray irakaslearekin.