euskalkultura.eus

euskal diaspora eta kultura

Albisteak rss

X. urtemugako kontzertu nagusiak: 'Requiem re txikian' kantatuko du bihar eta etzi Camerata de la Luna-k

2013/11/01

Kontzertuak sustatzeko afixa
Kontzertuak sustatzeko afixa

PUBLIZITATEA

2013aren amaierara iristen ari gara eta San Luis probintzia argentinarreko Villa Mercedesen 'Camerata de la Luna' abesbatzak urteko emanaldi garrantzitsuenak eskainiko ditu asteburu honetan, bihar larunbata San Luis hirian eta igandean Villa Mercedesen. Biak taldearen hamargarren urteurrenaren programa barruan burutuko dira baina elkartasunezko helburua ere izango dute: duela bi urte San Luiseko Santa Maria Eskolako ikasleek pairatutako ezbeharra gogora ekartzea. Camerata de la Lunak hautatutako obra Wolfgang Amadeus Mozart-en Requiem re txikian da.

Villa Mercedes, San Luis. Hamarkada bat ari da aurten betetzen Villa Mercedeseko Euskal Etxearen baitango Camerata de la Luna korala sortu zenetik eta urtemuga berezia ospatzeko, apirilean ekin zion taldeak urteko egitarauari, bi lehenengo kontzertu eskainiz. Ikuskizunak San Luis hiriburuan eta Villa Mercedes bertan izan ziren eta bietan Johann Sebastian Bach-en Actus Tragicus- BWV 106 interpretatu zuen.

Klasikoekin jarraituz, 2013 honetako emanaldi nagusiak eskainiko ditu taldeak asteburu honetan. Oraingo errepertorioari dagokionez, San Luis probintzian inoiz aurkeztu ez den Wolfgang Amadeus Mozart-en Requiem re txikian bertsio laburra abestuko dute Villa Mercedeseko kantariek, organoak lagunduta, adierazi digute bertatik.

“Garrantzi handia izango dute kontzertuek; alde batetik, San Luis probintzian errepertorio hau egiten den lehen aldia baita; bestalde, herriko eta inguruko herrietako artistek parte hartuko dutelako”.

Izan ere Cameratarekin batera aurkeztuko diren musikarien zerrendak honakoak biltzen ditu: Mendozako Jimena Semiz sopranoa, Veronica Montiveros mezzo-sopranoa, Cristian Mella tenorea, Fernando Lazari baritonoa, eta Cristian Canaviri eta Sebastian Zabala organistak. Artista hauez gain, San Luis hiriko Santa Lucia Abesbatza Polifonikoak ere lagunduko du Camerata kontzertuetan.

Kontzertu-omenaldia

Baina asteburu honetako kontzertuak proposamen artistikoa baino gehiago dira. Izan ere, Requiema hildakoen omenezko meza izanik, omenaldi moduan eskainiko du Cameratak. Ekintzaren zuzendari artistikoa den Francisco Mensak adierazi duenez: “Marcelo Sosa Hezkuntza Ministroak proposatu zigun duela bi urte Zanjitas-eko tragedian hil zirenen omenaldi bilakatzea [tren batek eskola autobus bat harrapatu zuen, zortzi hildako eraginez --sei adin txikiko eta bi heldu- gorpuak erabat desegin eta desitxuratuak utziz] eta guk geurea egin dugu ekimen hori. Geure hondar-alea eskainiko dugu honela, kontzertu-omenaldi hionen bidez”.

Biharko hitzordua, beraz, San Luis hiriko Nuestra Señora del Trono Elizan izango da, San Martin eta 25 de Mayo kaleetan, gaueko 9etan. Igandekoa, berriz, Villa Mercedesen, San Roque Elizan, ordu berean. Sarrera libre eta doakoa.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia