euskalkultura.eus

Bartzelona, Katalunia. Bartzelonako Euskal Etxeak mikromezenasgo kanpaina jarri du abian aurtengo Zinemaldia jaialdiari bultzada emateko. Jaialdi honekin Euskal Etxeak Euskal Herrian eginiko zinea ekartzen du urtero kataluniar hiriburura. Azken urteetako harrera onaren ostean, aurten beste pauso bat eman eta jaialdia euskal elkartetik zine aretoetara eramatea erabaki du antolakuntzak.

Dena prest dago eta Zinemaldia apurka apurka ari da aditzera ematen aurtengoan ikusgai izango diren filmen berri bere blogean. Dagoeneko iragarri diren izenburuen artean  honako bi dokumental hauek daude: "El Método Arrieta" eta "Asier eta biok". Aurtengo edizioa otsailaren 13an hasi eta 22a arte luzatuko da.

Hala ere, zinema aretoetara jauzi hori egitea ez da erraza eta horretarako sostengua eskatu du euskal etxeak. Elkarteak kanpaina hasi du Tot Suma izeneko plataforman. Ahalegin honetan lagundu nahi duenak nahikoa du Zinemaldia.cat webgunera jotzea eta hor ageri dira datu eta argibide guztiak.

Mikromezenasgoa era askotan gauzatu daiteke, bakoitzak ahal duen diru kopuruarekin lagunduz: 10 euro, 20, 30, 100 edo, babesle izan nahi dutenen kasuan, 1.000 euro. Orotara 3.000 euro bildu nahi ditu elkarteak. Kanpaina honetan lorturiko dirua zinema areto, bidaia eta alojamenduak ordaintzeko erabiliko da, batik bat.