euskalkultura.eus

euskal diaspora eta kultura

Albisteak rss

Baietz-en soinu eta musikariek Arrecifeseko lagunak liluratu zituzten euskal etxean eskainitako ekintzetan

2011/06/13

Baietz Taldea Arrecifeseko kontzertuan (argazkia EE)
Baietz Taldea Arrecifeseko kontzertuan (argazkia EE)

PUBLIZITATEA

Euskal Herrian sorburua daukaten soinuak ez dira hain urrunak Argentinan, Baietz-i esker; izan ere, 2008an eta Cordoba hiriburuan jaio zenetik, taldeak euskaldunen tresnak eta musika eramaten ditu Argentinako hainbat bazterretara. Hitzaldi, tailer eta kontzertuen bidez, lau mutil cordobatarrok musikaren munduan ez ezik, euskal tresna, konposizio eta euskaran ere murgiltzeko aukera ematen diete beren jarraitzaileei. Horrelaxe sentitu dute Arrecifesen ekainaren 4an Euskaldunak Denak Bat-era hurbildutakoek. “Musikari gazteek emandako tailer eta hitzaldiak interesgarriak eta baliagarriak izan zaizkigu oso; eta kontzertuetan zein ondoren sortutako giroa gure bihotz euskalduneraino heldu zaigu”, aitortu dio euskal etxeko kide den Laura Nobilek EuskalKultura.com-i.

Arrecifes, Argentina. Egun osoko egitaraua aurkeztu ekainaren 4an Baietz Taldea osatzen duten musikariek, Fernando Zabalza, Franco Seghesso, Noe Fernandez, Agustin Alonso eta Gaspar Jaurenak,  Euskaldunak Denak Bat euskal etxean.

Larunbat goizean, hitzaldi didaktiko baten barnean, gai hauek hartu zituzten mintzagai adituok: euskal tresnen sorrera (lekuak eta prozedura); euskal flautak; albokaren sorrera, arnasa eta abesti tradizionalak; txalapartaren sorrera eta sagardo ekoizpenarekin duen harremana; eta euskal tresnen eta dantzen artean dauden loturak.

Baietz Arrecifesen 2011 01

[Larunbat goizean hitzaldi didaktikoa eman zuten Baietz-eko musikariek (argazkia EE)]

Tresnei buruzko tailerrak

Baina azalpen teorikoak topaketaren zati txiki bat baino ez ziren izan. Goizeko klasea bukatu eta lagunen arteko bazkaria partekatu ondoren, euskal etxeko egoitzara hurbil ziren lagunek -- tartean herriko eskoletako musika ikasle eta irakasleek -- euskal tresnak jotzeko aukera ere izan zuten.

Baietz Arrecifesen 2011 02

[Interes handia piztu zuten Euskal Herriko tresna tradizionalek Arrecifeseko lagunen artean (argazkia EE)]

Lau tailer eman zituzten Baietz-eko musikariek aldi berean, hain zuzen ere flauta, pandero, txalaparta eta albokari buruzkoak; eta publikoak, taldeka, irakasle bakoitzaren aholku eta oharrak jarraitu zituen Euskal Herriko musika tresnei soinuak ateratzeko.

Baietz Arrecifesen 2011 03

[Euskal etxeko kideek tresnak jotzeko aukera ere izan zuten (argazkia EE)]

Kontzertua euskaraz

Eta eskola teoriokoez landa, musikarekin hasi zen eguna musikarekin bukatu zen Arrecifesen. Errepertorio oparo baino oparoagoa oparitu zion Baietz-ek Euskaldunak Denak Bat euskal etxera bildu zen jendeari eta horren truke txalo zaparrada jaso zuten Cordobako gazteek. “Etxekook eta batez ere gure inguruan normalean ez dabiltzanak liluratu ziren Baietz-en musikarekin”, azaldu dio Laura Nobilek EuskalKultura.com-i. “Luxu handiko ikuskizuna izan dela eta mutilen profesionaltasuna aipatzekoa dela azpimarratu dute gonbidatu guztiek”, adierazi du Nobilek.

Baietz Arrecifesen 2011 04

[Euskal etxeko kideak Baietz taldeko musikariekin (argazkia EE)]

Arrecifeserako bisita bukatzeko, Baietz-eko kideek igande osoa igaro zuten Euskaldunak Denak Bat euskal etxean giro bikain eta informalean, kartetan jokatzen, musika joz eta, nola ez, Argentinan hain tipikoa den erreki bat dastatzen.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia