euskalkultura.eus

euskal diaspora eta kultura

Albisteak rss

Atxagak, Arregik eta Meabek Six Basque Poets liburua aurkeztuko dute Edinburgheko Literatura jaialdian

2007/08/07

'Six Basque Poets' liburuaren azala
'Six Basque Poets' liburuaren azala

PUBLIZITATEA

Erresuma Batuko Arc argitaletxeak igande honetan aurkeztuko du Edinburghen Six Basque Poets liburua. Mari Jose Olaziregik editatu eta Miren Gabantxok ingelesera itzuli dituen poema sorta biltzen du liburuak: Bernardo Atxaga, Rikardo Arregi, Felipe Juaristi, Miren Agur Meabe, Kirmen Uribe eta Joseba Sarrionandiaren olerkiak. Atxagak, Arregik eta Meabek egingo dute Edinburghen aurkezpena eta datozen hilabeteetan beste egileek ere aurkezpenak egingo dituzte Manchesterren (Ingalaterran) eta Renon (AEB).
Arc argitaletxeak euskarazko poesiari ateak ireki dizkio, Six Basque Poets liburuarekin. Mari Jose Olaziregik aukeratuta eta Amaia Gabantxok itzulita, liburuak Bernardo Atxaga, Rikardo Arregi, Felipe Juaristi, Miren Agur Meabe, Kirmen Uribe eta Joseba Sarrionandiaren poemak biltzen ditu, euskaraz eta ingelesez. Argitaletxearen New Poetry from Europe & Beyond saileko bigarren liburua da hau. Bildumaren helburua ingeles hizkuntzako irakurleei Europa eta beste kontinenteetako literatura ezagutzeko aukera ematea da, Mari Jose Olaziregik BasqueHeritage.com-i agertu dionez. Idazle eta editorea izateaz gain, Olaziregi Renoko Center for Basque Studies-eko kidea da eta euskal literatura munduratu eta beste hizkuntzetara itzultzeko makina bat lan egiten ari da azken urteetan.

Liburuan aukeratutako sei poetek 'azken 30 urteetan euskal poesiaren bilakaeran berebiziko eragina izan dute', argitaletxeko arduradunek azaltzen dutenaren arabera. Liburuak biltzen duen poesia 'zuzena eta indartsua' da, haien esanetan, 'antzinako hizkuntza bat erabiltzen duelako agian marginatuta gelditu zitekeena, baina egungo Europako beste literaturak bezain indartsu eta orijinala dena'.

Liburua Eusko Jaurlaritzaren Kultura Sailaren laguntzarekin eta Manchesterreko Cervantes Institutuaren laguntzarekin argitaratua izan da, besteak beste. Lehen aurkezpena igande honetan egingo dute, Edinburgheko jaialdian, Bernardo Atxagak, Rikardo Arregik eta Miren Agur Meabek. Urrian Kirmen Uribe eta Felipe Juaristiren txanda izango da, Manchesterreko Cervantes Institutuan.

Euskal Literatura Topaketa Renon, 2008an

Azaroan Uribe eta Atxaga Renon izango dira eta irakurtaldiak eskainiko dituzte Nevadako Unibertsitateko Center for Basque Studies-en. Bertan egingo da 2008ko apirilean Euskal Literaturaren Nazioarteko I. Topaketa. CBS-ak antolatuko ditu lehendabiziko nazioarteko jardunaldi hauek eta Bernardo Atxaga izango da gidaria.

Ordurako CBS-ak History of Basque Literature liburua argitaratuko du, ahozko narrazioetan hasi eta egungo euskarazko literatur produkziorainoko bidea egiten duen Euskal Literaturaren Historia. Liburua egiteko bildu diren egileen artean honokoak daude: Jean Haritschelhar, Beñat Oihartzabal, Aurelia Arkotxa, Igone Etxebarria, Joxerra Garzia, Lourdes Otaegi, Xabier Altzibar, Jesus Maria Lasagabaster, Patri Urkizu, Xabier Etxaniz, Manu Lopez eta Mari Jose Olaziregi bera. Amaia Gabantxok itzuliko du lana ingelesera.


Lotura interesgarriak

Edinburgh-eko Literatur Jaialdia
www.edbookfest.co.uk

Arc argitaletxea
www.arcpublications.co.uk

Center for Basque Studies, Reno, Nevada, AEB
http://basque.unr.edu


« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia