euskalkultura.eus

Boise, Estatu Batuak. Uztailaren 21etik 24ra bitartean, Athletic Club-eko emakumeak Boisen (Idaho, Estatu Batuak) entrenatzen arituko dira. Ez beraiek sasoian mantentzeko, baizik eta gazteentzat antolatutako Futbol Udalekuak zuzentzeko. Bost eta hamasei urte bitarteko ume eta gaztetxoengan pentsatutako programa da eta mutiko zein neskatoentzat pentsatua.

Udalekuko antolatzaile den Argia Beristainek EuskalKultura.com-i adierazi dionez, “oso positiboa izan da proposamenak orain jaso dituen arreta eta harrera. Dagoeneko Idahoko eta Estatu Batuetako mendebalde osoko 300 umetik gorak eman dute izena”.

Lortutako dirua Boise State University-ko Euskal Ikasketa sailean berrinbertitzeko da, bai eta 2015eko Boiseko Jaialdian zurigorrien gizonezkoen partida bat antolatu ahal izateko. “Gaur egunean, Euskal Ikasketen programak ez du dirurik eta giro akademikotik desagertzeko arriskuan dago, Boise bezalako hiri batek euskal diasporarentzat duen esanahiarekin. 2015eko partidako diruarekin programa betiko biziko zen”, Beristainen esanetan.

Programak uztailaren 21ean hasi (astelehena) eta 24an bukatuko da (osteguna), hiriko San Inazio euskal jaiekin bat eginez. Bost eta zazpi urte bitarteko umeek 90 minutuz arituko dira futbolean, egun bakoitzean, goizeko 9:00ak eta 10:30ak bitartean (100$). Eta 8-16 urte tarteko gaztetxoentzat bi aukera jarri dituzte mahai gainean: Egun osoko plana (9:00-15:00), lau egunetan zehar, 225 dolarretan. Eta egun erdiko plana, 9:00etatik eguerdira arte, 150$.

Udalekua Boiseko Simplot Soccer Complex-en egingo da. Informazio gehiago nahi izatekotan Jim Thomas-ekin hitz egin dezakete interesa dutenek: jimthomas@boisestate.edu helbidera idatzita edo +1 (208) 426-5425 telefono zenbakira deituta. Aukera ere badago info@basquestudies.org e-posta helbidera idazteko.

Boise State University-ko Euskal Ikasketa saila dago Udaleku berezi hauen atzean, unibertsitateko emakumeen futbol taldea eta Idaho Youth Soccer Associationekin batera.