euskalkultura.eus

euskal diaspora eta kultura

Albisteak rss

Arrecifeseko Euskaldunak Denak Bat-ek bere 92 . urteurrena ospatu du, 70 bat lagunentzako afari batekin

2014/02/25

Euskaldunak Denak Bat euskal etxearen 92. urteurrenean edade guztietako kideek abestu zuten 'Zorionak zuri' abestia (argazkiaEE)
Euskaldunak Denak Bat euskal etxearen 92. urteurrenean edade guztietako kideek abestu zuten 'Zorionak zuri' abestia (argazkiaEE)

PUBLIZITATEA

Ez zaio sobera falta Arrecifeseko Euskaldunak Denak Bat-i ehun urtetik gorako Argentinako euskal erakundeen multzoan sartzeko; epe horretan, kultura mantendu ez ezik, zabaldu ere egin du, euskal jatorrizko etorkinak babesteko Buenos Aires probintzian sortu zen instituzioak. Historia luzea da, urratsez urrats egina. Hori ospagai harturik, euren 92. urtemuga ospatzera bildu berri dira euskal etxeko kide eta betiko lagunak. Urtebetetze jaiarekin batera, udan egindako beste ekintzen berri jakinarazi digute euskal elkartetik.

Arrecifes, Argentina. "Iraganaren eta etorkizunaren arteko kate-begi eta lokarri izan ohi dira euskal etxeak. Izan ere, euren ardura nagusietako bat da arbasoen ondarea gaurkotu eta biziarazi eta belaunaldi berrien proiektuen lehen-gai eta lanabes bihurtzea". Horixe gogoan ospatu zuen bere 92. urtemuga Arrecifeseko Euskaldunak Denak Bat euskal etxeak joan den asteko asteazkenean, otsailaren 19an.

Afaria egoitzako tabernan burutu zen eta 70 bat lagun bildu ziren ‘Zorionak’ abestu eta tarta zati bat jateko, euren artean Marcos Pernicone Bitarteko Alkatea eta Julio Suarez Gobernu Idazkaria. Ohikoa denez, topa egiteko momentuan, hitz batzuk zuzendu zizkien bildutakoei Juan Lucio Agotegaray euskal etxeko kideak.

Aipatzekoa da, euskal etxean bertan egun batzuk lehenago gauzatu zen Maral-en kontzertuan, aipamen berezi bat izan zuela ‘La Vasca’ izenarekin ezaguna den erakundearen urteurrenak. Marta Abarrateguiren hitzetan esateko, “hitz polit batzuk bota zituen Marianak (Domine Irigoyen) urtebetetzeaz eta erakundeari buruz eta euskarazko abesti bat kantatu zuen guztiok lagunduta”. Gogora dezagun Maral Taldeak harreman estua daukala euskal etxearekin eta Mariana Domine erakundeko lehendakaria izan zela 2000 eta 2004 urteen artean.

Urtebetetze festaren baitan, 2013ko ekintzak biltzen dituzten bi bideo helarazi dizkigu euskal etxe arrecifestarrak (ikus hemen 1. bideoa eta 2. bideoa ).

San Sebastian eguna Arrecifesen

Argentinako euskal etxe gehienek eten bat egin ohi dute urtarril eta otsailean agintari eta kideek merezitako oporrak hartu ahal izateko. Ez guztiek ordea. Udak ez zituen Euskaldunak Denak Bat-eko euskara ikasle eta irakasleak kikildu eta klaseetara joaten jarraitu zuten beroa gorabehera. Saria ere izan dute; klase horietako batzuen ostean pintxo eta edariak partekatu dituzte, klaseen udako osagarri.

San Sebastian Jaia Arrecifesen 2014 01

[Arrecifesen ere ospatu da 2014ko San Sebastian Eguna (argazkiaEE)]

Are gehiago, euskara taldeen eta Lucio Echaniz Liburutegiaren eskutik ospatu da aurten Arrecifesen San Sebastian Eguna. Martxa errepasatu ondoren eta bideoetako irudiak eredu hartuta euren danborrada jo zuten euskal etxeko lagunek. Danborren hots eta haizto eta sardeska erraldoien artean etxeko afariaz gozatu zuten bildutakoek.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia