euskalkultura.eus

euskal diaspora eta kultura

Albisteak rss

Argentinar Selekzioa: Hiritar ospetsu izendatu eta harrera jendetsua egingo diote gaur Pablo Zabaletari Arrecifesen

2014/07/16

Arrecifesek Hiritar Ospetsu izendatuko du gaur Argentinako selekzioko Pablo Zabaleta (argazkia Mcfc.co.uk)
Arrecifesek Hiritar Ospetsu izendatuko du gaur Argentinako selekzioko Pablo Zabaleta (argazkia Mcfc.co.uk)

PUBLIZITATEA

Harrera jendetsua egingo dio gaur, iluntzeko 7:15etan, Arrecifes hiriak Brasilgo Munduko Futbol Txapelketako finala jokatu duen Pablo Zabaletari. Omenaldia Mitre Plazan izango da eta bertan Arrecifesko Hiritar Ospetsua izendatuko du Daniel Bolinaga alkateak. Herri osoa bilduko da plazara txapelduna agurtzeko, tartean Euskaldunak Denak Bat-ko kideak. “Txikitan gure dantzari izan zen Pablo; eta euskal jantzi tipikoaz jantzita etortzen zen familiarekin San Inazio jaietara”, gogoratzen dute euskal etxekoek.

Arrecifes, Argentina. Iragan dira hokezkero Brasilen jokatu zen Munduko Futbol Txapelketa, eta horrekin lotutako kezkak, urduritasuna eta nola ez, Alemania eta Argentinaren arteko partidaren nahigabeak. Baina nazioarteko ekitaldi honen arrastoak kirolaren mugak gainditzen ditu eta bere eragina gizarte arlo guztietara iristen da.

Izan ere, herrialde osoa prestatu da egun hauetan Brasilen aritu diren jokalariei harrera ekitaldietarako. Eta azken emaitza gorabehera, agurtu eta zoriondu nahi dituzte herritarrek kamiseta zuri-urdin argia lehiaketaren finalera eraman zuten futbolariak.

Arrecifesen kasuan, gaur egingo diote harrera bertako Pablo Zabaleta atzelariari. Hitzordua arratsaldeko 7:15etan da, Mitre Plazan. Bertan, ongietorria emateaz gain Hiritar Ospetsu izendatuko du Daniel Bolinaga alkateak selekzioko jokalaria. Zeremonia berean, ‘Pablo Zabaleta’ izena jarriko diote Udaleko Futbol Zelaiari.

Plazara iritsi aurretik, suhiltzaileen kamioan eramango dute Manchester City klubeko jokalaria Obras Sanitarias klubera bertan hasi baitzen Zabaletaren ibilbidea futbolean. Klubeko umeak agurtu ondoren, plazarako bideari ekingo dio berriro Cristo de la Hermandad, Brown Plaza eta Belgrano Etorbidetik pasatuz. Bukatzeko, Merlassino etorbidetik iritsiko da Udaletxera harrera jasotzera.

Euskal jatorrizko beste txapeldun bat

Luzea da Argentinako selekzioa osatu dutenen euskal jatorrizko jokalarien zerrenda. Ez dugu oso urrun joan behar, ‘Goico’ Sergio Goycochea, ‘el Vasco’ Julio Olarticoechea edota  Jorge Luis ‘el Burru’ Burruchaga izenekin topatzeko. Aurtengo Txapelketan ere izan dira euskal argentinarrak eta haien artean Pablo Zabaleta dago. 

[“Zabaleta oso euskalduna da, Leitzakoa, Nafarroakoa” hitz hauekin zoriondu berri du Zabaletak Allerru
 Kluba (bideoa eitb)]

Pablo Euskal Etxeko dantzaria izan zen txikitan Arrecifeseko Euskaldunak Denak Bat-en. Eta, bertan gogoratzen dutenez, Pabloren aita, Jorge, erakundeko Zuzendaritza Batzordeko kide ere izandakoa da. Baina bere euskal sentimendua ez dirudi soilik aspaldiko kontu bat. Izan ere, oraintsu, martxoan, Allerru Lezoko klubaren 50. Urteurrenaren baitan egindako bideo batean “Zabaleta oso euskalduna da, Leitzakoa, Nafarroakoa” adierazi zuen harro, Pablo Zabaletak (ikus bideoa).



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia