euskalkultura.eus

Bego Miñaur. Iragan otsailaren 22an amaitu zen Bartzelonako Euskal Etxeak antolatu duen Zinemaldia.Cat jaialdia eta arduradunak oso pozik agertu dira lehen edizio honek izan duen emaitzarekin. Egiaz, zinemaldiaren bederatzigarren edizioa izan da aurtengoa, baina lehen aldiz aretoetara jauzi egin eta lehiaketa ofiziala estreinatu duenez, aro berri bat hasi du.

"Harrera oso ona izan da, bai euskaldunena eta baita katalanena ere", azaldu dio EuskalKultura.com-i Ekaitz Garatek. "Kataluniako zine munduaren babesa ere sentitu dugu. Lehiaketa ofizialaren epaimahaian hemengo izen oso ezagunak izan dira (Marc Recha zuzendaria, Aina Clotet eta Joal Joan aktoreak eta Jordi Ambrós ekoizlea). Euren jarrera aparta izan da. Zinemaldiarekin euskal zinea erakusten jarraitu nahi izan dugu, lehen bezala, baina orain gainera Kataluniako zine munduarekin zubia sortuz".

[Inaugurazio ekitaldian, Joel Joan aktore eta epaimahikidea eta Ander Otaola aktorea solasean. Otaolaren "Gernika bonbapean" filma izan zen ikusgai Zinemaldia.Cat-en lehen egunean (argazkia Jordi Borrás)]

[Gorka Otxoa aktorea ETBko kazetariekin hizketan, Zinemaldia.Cat.en inaugurazioan (argazkia Jordi Borrás)]

Lehiaketa ofizialeko saria 'Izenik Gabe 133x200' dokumentalak eskuratu du, Jose Luis Zumeta pintorearen lana eta sorkuntza prozesua era erakargarrian erakusteagatik.

Orohar, Girona zinema aretoak sarrera ona izan du emanaldietan. Guztira 1.200 bat ikusle igaro dira bertatik eta azken egunean, 'Asier ETA biok' dokumentalararen estreinaldian aretoa jendez lepo izan zen. Hainbat ikusle lekurik gabe eta kalean gelditu ziren. "Interes hori dagoela ikusita, berriz ere emango dute filma Girona zinemetan, aste honetan zehar", aipatu du Garatek.

[Zinemaldiko kamisetak banatzen, Girona Zinematan (argazkia Jordi Borrás)]

"Zuek ekoizle"

Zinemaldia.Cat-ek aurten ekarri duen beste berritasuna "Tot Suma" webgunean egin den mikromezenasgo kanpaina izan da. Jaialdiaren antolakuntzan laguntzeko finantziazioa eskuratu du horrela antolakuntzak, eta ere berean jendea proiektuaren parte sentiarazi du. Kanpainak aurrekontuaren %103a lortu zuen.

"Lasaitu handia hartu genuen beharrezko dirua lortu genuenean. Ia 100 lagunek jarri dute dirua, eta gehienek kamiseta edo sarrerak jaso dituzte horren truke", esan du Garatek. "Ilusio handia egin digu ikusteak Euskal Herritik ere jendeak dirua jarri duela, nahiz eta emanaldietara ezin etorri. Jendea partaide sentitu da, eta horrela esan genien inaugurazioan, beraiek gabe ezingo genuela Zinemaldia egin, topikoa da, baina kasu honetan egia, beraiek ere izan direlako zinemaldiaren ekoizle".