euskalkultura.eus

Buenos Aires, Argentina. Orain dela 20 urte, lehenbizikoz elkartu ziren gazte batzuk La Pampako Macachin herrian euskara ikasteko. Seguruenik momentu hartan inork ez zuen pentsatu ere egingo lehenengo 'barnetegi' hura, zerrenda zinez luze baten lehenengoa izango zenik eta euren ondoren makina bat ikaslek ikasiko zutenik euskara Argentinan. Antolatzaileek, irakasleek eta ikasleek ez zuten batere pentsatuko eurak Argentinan bultzatutako esperientzia beste herrialde batzuetan euskara irakasteko eredu bihurtuko zenik. 1990. urtean bildutako taldeak ez zuen imajinatuko baina hau dena egia bilakatu da; hau guztia dela eta, FEVAk –gaur egun HABErekin batera proiektua aurrera eramaten duen instituzioak – 20. urtemugaren ospakizunetan parte hartzeko gonbitea luzatzen du, badago-eta zer ospatua, EuskalKultura.com-i esan dionez.

Argentinako Federazioak proposamen batzuk bildu nahi ditu ospakizunetan parte hartzeko gogoa dutenengandik, guztien ideiak, materialak, ekoizpenak jasotzeko eta bideratzeko. Oraingoz, urtean zehar egin litezkeen ekintzen behin-behineko zerrenda kaleratu dute. Ikasle, irakasle, bazkide, eta euskararen lagunei asmoak eta iradokizunak bidaltzea eskertuko diete.

Proposamenak:

• "Argentinan Euskaraz: 20. urteurrena" logo txapelketa.
• 1990-2010en artean barnetegietan trebatutako irakasleen datu basea osatzeko kontaktuak egunaraztea
• FEVAren webgunean Argentinaz Euskaraz-erako esparru berezia sortzea. Bertan:
       - argazki-galeria: irakasleei barnetegietan hartutako bostna argazki bidaltzeko eskatuko zaie galeria osatzeko
       - barnetegietan eskolak eman dituzten eta trebatu ziren irakasleen esparrua sortzea, haien argazki eta perfilez
• Bertsolaritza: gaia eta doinua jarrita, bertsoak sortzeko deialdia
• “Euskara zure Euskal Etxean”, “Zure esperientzia euskararekin”, horren inguruko lekukotasunen jasoketa
• Euskal Asterako ekintzak, Mar del Platako Denak Bat euskal etxearekin batera planifikatzeko
• Argentinan emandako lehenengo barnetegian, Macachinekoan hain zuzen, klaseak eman zituzten irakasleei Euskal Astean etortzeko gonbidapena luzatzea, bertan urtean zehar egingo diren ekintzei amaiera emango zaielakoan
• Urteurrenaren inguruan sortzen den materialaz erakusketa edota dossierra osatu eta argitaratzea.

Hauek dira FEVAk proposatutako jarduerak. Dena den, eta erantzunak jaso ahala behin-behineko plana zehaztuko da. Federazioak eskertuko du erantzunak ahalik eta azkarren bidaltzea, ekintzak martxoan abian jartzeko asmoa baitu.

Lotura interesgarriak

HABE erakundea
www.habe.org

Argentinako Federazioa
www.fevaonline.org.ar