euskalkultura.eus

euskal diaspora eta kultura

Albisteak rss

Arantxa Urretabizkaia eta Eider Rodriguez euskal idazle izateaz mintzatu ziren atzo Chicagon

2012/04/13

Ezker-eskuin, Estibalitz Ezkerra (aurpegia ikusi gabe), Mari Jose Olaziregi, Eider Rodriguez eta Arantxa Urretabizkaia atzo osteguneko ekitaldian Illinoisko Unibertsitatean.
Ezker-eskuin, Estibalitz Ezkerra (aurpegia ikusi gabe), Mari Jose Olaziregi, Eider Rodriguez eta Arantxa Urretabizkaia atzo osteguneko ekitaldian Illinoisko Unibertsitatean.

PUBLIZITATEA

Illinoisko Unibertsitateak, bertan Koldo Mitxelena katedra inauguratzea kari euskara eta euskal kulturaren erakuslehio antolatutako ekitaldien artean, atzo ostegunez euskal literaturari buruzko eguna pasatu zen, gonbidatu gisa Arantxa Urretabizkaia eta Eider Rodriguez idazleak, eta Jaurlaritzako Blanca Urgell Kultura sailburua eta Mari Jose Olaziregi Etxepare Institutuko Euskararen Sustapenerako zuzendaria ere partaide zirela. Unibertsitateko euskara ikasleek, eurek espres eginiko bertso batekin eman zieten ongietorria gonbidatuei.

Urbana-Champaig, Illinois, AEB. Mari Jose Olaziregik hartu zuen bere gain atzo ostegunez Illinoisko Unibertsitatean Arantxa Urretabizkaia eta Eider Rodriguez idazleak aurkezteko lana, Koldo Mitxelena katedraren inaugurazioarekin batera antolatutako euskal programaren baitan, Etxepare Institutua laguntzaile.

Fikzioa euskaraz idaztea zen mahai gainean hizpide ipinitako gaia, eta Olaziregik Etxepare Institutuaren atsegina adierazi zuen euskal literatura eta literaturgileak Illinoisko publiko interesatuaren aurrean aurkeztu ahal izateagatik, aipatu bi emakume sortzaile hauek bertan zuzenean euren idazle lekukotasuna eta esperientzia azaltzeko egokitutako aukeragatik.

'Euskal Fikzioa: utopia eta erronkak' izenburupean, Arantxa Urretabizkaia eta Eider Rodriguez literaturan bakoitzak izan dituen euren eskarmentuez mintzatu ziren, literatura idazle eta euskal idazle gisa, horrek eurentzat dituen ezaugarri eta esanahiak azalduz bertaratutakoen aurrean.

"Utopia bat bizi dugu gaur egun euskal literaturari dagokionez", esan zuen Urretabizkaiak. "Iruditzen zait, hein handi batean, euskararen inguruko diskutso agonikoa desagertu egin dela. Nik gaixotasun asko ditut, eta optimismoa horietako bat da", azaldu zuen idazleak, literaturari Euskal Herrian etorkizun oparoa iragarririk.

Eider Rodriguezek, bere aldetik, euskara erabiltzeak daukan garrantzia azpimarratu zuen hizkuntza aitzinarazi eta geroa ematearren. "Gaur egun, euskara hiztunen %100ak gaztelania daki", esan zuen Hegoaldeko egoera aipatuz. "Eta protzentaia horrekin, batzuk esango lukete praktikoena munduari gaztelaniaz zuzentzea izango zela". "Hala ere, euskaraz mintzatzeko aukera bat galtzen dudan bakoitzean, hizkuntzaren zatiño bat desagertu egiten da. Apur bat, gauza nimiño bat, ezdeusa, badakit. Hauts partikula bera, gauza nimiño bera gara gu unibertsoarentzat", hausnartu zuen.

Mahai inguruan Blanca Urgell Jaurlaritzako Kultura sailburua ere eseri zen, Champaign-Urbanara ekitaldiotako partaide izateko propio iritsia. Euskal gonbidatuek harrera polita jaso zuten unibertsitateko euskara ikasleek emana, horren adierazle euskaraz kantatu zieten bertso hau:

Idazle maiteak
Guk bertso bat dugu
Eskerrik asko zuei
Esan nahi dizuegu
Hemen gu euskarazko
Ikasleak gara
Ongi-etorri zuei
Champaign-Urbanara.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia