Ambareseko Ongi Etorri elkarte gazteak Euskal Eguna ospatu zuen Bordeleko lagunekin

2014/05/08

Ambaresko Ongi Etorri elkartearen Euskal Eguna (argazkia BordeleEE)

PUBLIZITATEA

Bordeletik gertu dagoen Ambarés herrian bada euskal elkarte ttipi bat, Ongi Etorri izenekoa. Hogei bat bazkide baino ez ditu, baina azken urteotan hainbat ekitaldiekin inguruetan oihartzuna lortzen ari da. Iragan apirilaren 27an Euskal Eguna ospatu zuen elkarteak eta bertara bildu ziren Bordeleko euskal etxeko bazkideak. Orotara, 200 bat lagun izan ziren festan, besteak beste Ambaresko alkate Michel Heritié, euskaldunen semea, harrera hitzaldia frantsesez eta euskaraz egin zuena.

Ambares, Frantzia. Egun ederra izan zen apirilaren 27an Ambaresko Ongi Etorrik egin zuena euskal festa eta 200 bat lagun bildu ziren bertara euskal kulturaz, gastronomiaz, musikaz eta dantzaz gozatzeko. Elkarte txikia izanagatik Ongi Etorrik hainbat jarduera burutu ditu azken urteetan, horien artean Euskaldunen Eguneko ospakizunak eta euskara ikastaroak, besteak beste.

Elkarteak hogei bat bazkide ditu eta Dominique Lecuona da presidentea. Aurrenko presidentea, Piarres Trounday Bordeleko Euskal Etxeko bazkidea ere bada eta itzal handikoa gainera. Agian horregatik, edo bi elkarteen arteko gertutasunagatik harreman bikainak dituzte. Esaterako, azken bi urtetan Bordeleko euskal etxeak euskara ikastaroak abian jartzen lagundu dio Ongi Etorriri.

Ambares Euskal Eguna 2014

[Euskal kantuek alaitu zuten Ongi Etorri elkartearen festa (argazkia BordeleEE)]

Ambares Euskal Eguna 2014 2

[Bazkalostean, dantza! (argazkia BordeleEE)]

Ikastaro horietan euskara landu duen ikasleetako bat Ambareseko alkate Michel Heritié da eta bera izan zen Euskal Egunean bertara bildu zirenei harrera hitzaldia euskaraz eta frantsesez egiteko ardura izan zuena. Euskaldun semea da Heritier eta Ambaresen badira bera bezelako euskal jatorridun lagun asko; izan ere, 40 hamarkadatik aurrera euskaldun asko etorri ziren hirira bertako petrolio lantegietan eta nekazaritzan lan egitera.

Ambares Euskal Eguna 2014 3

[Festara bildu ziren elkarteko kide batzuk Ambaraseko Michel Heritié alkatearekin (argazkia BordeleEE)]

Euskal Egunaren antolakuntzaren ardura Bordeleko Euskal Etxeko Ongi Etorriko presidente orde (eta Pilotariak jardueraren buru) Bruno Lurok izan zuen. Festan giro bikaina izan zen eta musika Iparraldetik etorritako Mixpirarrek taldeak jarri zuen.

Informazio gehiago, Ongi Etorri elkartearen blog-an.

Festaren argazki gehiago, Bordeleko Euskal Etxearen Facebook orrian.