euskalkultura.eus

Berlin, Alemania. Strenberg Grundschule izeneko eskolan egin zen Udako Festan partaide izan zen Berlingo EEa, txalaparta eta alboka lantegiak eskainiz, iragan larunbatean. Festak "Munduari itzulia" zuen gaia eta bertan hiriko gizatalde desberdinek euren kultura eta ohiturak erakusteko lantegiak eta jarduerak antolatu zituzten.

Euskal Etxearen lantegiak hiru atal zituen, Ainhoa Añorga elkarteko presidenteak EuskalKultura.com-i azaldu dionez. "Hasteko, txikienentzat pentsatua, alboka baten marrazkia zuten orriak prestatu genituen, bertan bakoitzak bere alboka koloreztatu eta etxera eraman ahal izateko. Bestetik albokarentzako beharrezkoa den arnasketa zirkularra ikasteko alboka marrazkia zuten edalontzietan lastotxo batekin proba egin zuten eta arnasketa hori lortzeko asko entrenatu behar zela ikusi zuten". Ainhoak agertu duenez, arnasketa ikasi eta gero batzuk alboka jotzen saiatu ziren eta notaren bat ere lortu zuten, pozaren pozez.

[Txalaparta txikia eta handia montatu ziren lantegietan, eta batean zein bestean iladak izan ziren apur bat jotzeko (argazkia BerlinEE)]

Azken atala txalaparta lantegia izan zen. Bi txalaparta muntatu zituen euskal etxeak, bat handia eta bestea txiki-txikia, haur txikienak ere makilatxoekin aritzeko. "Haurrak bakarrik ez, guraso eta irakasleak ere saiatu ziren txalaparta jotzen. Gainera, musikapedagogoak informazioa hartu zuen instrumentua bere eskoletan ezagutarazteko, asko gustatu zitzaiolako", agertu du Ainhoak.

Euskal etxea oso pozik agertu da lantegiek izan duten harrerarekin eta etorkizunean antzeko jarduera gehiago antolatzekotan dira. "Hoberena haurrentzako irratitik etorri zen kazetariari haurrek emandako azalpenak izan ziren. Harriturik zeuden egur zati batekin musika egin eta hain ongi pasa zutelako", amaitu du Ainhoak.