euskalkultura.eus

Buenos Aires, Argentina. Etzi inauguratuko da Konpostelako Santiagon MICAtlanticaren (Atlantikoko Kultur Industrien Lehenengo Merkatua) lehenengo edizioa. Proposamenak Argentina, Espainia eta Portugalgo kultura ekoizleak batuko ditu, esan nahi baita Diseinu eta Eskulanak, Musika, Argitalpenak, Arte Eszenikoak, Arte Audiobisualak eta Bideojokoak sortzeko lanean aritzen direnak.

Erakustaldia lau egunez luzatuko da eta aktibitateak zenbait gunetan banatuko dira. MICAtlántica EXPO izenekoan, esaterako, Galiziako industria kulturalaren produkzioak erakutsi eta tailer eta hitzaldiak eskainiko dira. MICAtlántica FORUM izenekoan, berriz, mahai-inguruak gauzatuko dira; MICAtlántica Show-en, artista ugariren ikuskizunak plazaratuko dira. Kontzertuei dagokienez, aipatu behar da Galiziako Erret Filarmonikoarekin batera Jose Luis Castiñeira de Dios eta Cristian Zarate musikari argentinarrak aurkeztuko direla eta Marcelo eta Hugo Dellamea gitarra joleek eta Chango Spasiuk soinujoleak ere joko dutela Santiagon.

Etxepare Institutua MICAtlantica-n

Argentina Nazioko Kultur Idazkaritzak eta Argentina eta Mercosur-erako Euskadiko Ordezkaritzak egindako ekarpenari esker, Euskal Autonomia Erkidegoak ere hartuko du parte ekimenean. Izan ere, Aizpea Goenaga Etxepare Euskal Institutuko zuzendariak Institutuaren aurkezpena egingo du igandean, arratsaldeko ordu bietan, eta telebistako plataforma berriei buruzko mahai-inguru baten moderatzailea izango da egun berean arratsaldeko 4etatik aurrera. ‘Formatu berriak eta telebistako plataforma berrientzako edukiak’ izeneko mahaiak honako partaideak izango ditu: Claudio Villarruel eta Bernarda Llorente (Argentinakoa, ON TV/360TV); Gonzalo Armendares (Argentinakoa, Underground Producciones); Dario Janeiro (Galiziakoa, CINFO/R); eta Carlos Carballo (Galiziakoa, Voz Audiovisual). Gogora dezagun Aizpea Goenagak jardunbide oparoa daukala ikus-entzunezko arloan, zine eta telebistan, aktore, idazle eta zuzendari gisa.

-MICAtlantica-z informazio gehiago, www.micatlantica.org/index