euskalkultura.eus

Zarautz, Gipuzkoa. Ainoa Irazusta euskal argentirra iaz etorri zen Euskal Herrira, Bahia Blanca sorterria utzita, Zarautzen Karlos Argiñano sukaldariaren eskolan praktikak egin eta gastronomia ikasketak egitera. Betidanik gustatu izan zaio sukaldean aritzea; familiarekin ikasi zuen grina omen da.

"Amonaren eta nire aitaren kroketak dira errudunak, hortik datorkit grina hau", esan dio Ainoak EuskalKultura.com-i. "Bahia Blancako Euskal Etxean talde handi bat biltzen ginen, jaietarako eta edozein ekitalditarako janaria prestatzera: tortilak, enpanadak... Plazera zen beti, bagenekielako gu lanean ari ginela besteek janariaz gozatzeko, lagunartean eta aldarte onean", azaldu du.

Politikatik sukaldera jauzi

Politika ikasketak hasi zituen Ainoak, baina aurki konturatu zen bere ametsetatik politika "errealera" tarte zabala zegoela. "Politika erreala ez zen niretzako, nik ezin nuen gauza bat esan eta beste bat egin", gogoratu du. Karrera hori utzi eta sukaldaritza ikasten hasi zen.

Ainoaren senitarteko asko Euskal Herrira etorriak ziren, eta haien babesean, bera ere etorri zen, Iker anaiak Zarautzen eta Orion dituen bi txiringitoetan --Borghetto eta Gure Aitona-- udan laguntzera. 2009an etorri zen aurrenekoz, eta iaz berriz ere bueltatu zen, oraingoan urte osoan gelditzeko Argiñanorenean ikasten.

"Inork ez daki ezer"

ETBko saioaren emisioan Ainoaren azento argentinarrak jakinmina piztu zuen, Diasporari eta autodeterminazioari buruz egin zuen galderak bezalaxe. "Grabaketa amaituta, bat baino gehiago etorri zitzaidan Diasporaren kontu hori zer demontre ote zen galdezka", esan du berak. [Programa osoa berriz ikusteko, jo hona].

"Ez dizut gezurrik esango, hona etorri nintzenean sekulako dezepzioa izan nuen. Iaz Zarautzeko dantza talde batean sartu nintzen, eta orduan konturatu nintzen hemen inork gutxik duela Diasporaren berri. Tutik ere ez dakite!", kexatu da 27 urteko gaztea. "Harrituta zeuden nirekin: Baina non ikasi duzu dantza hori? Argentinarra izanda zergatik duzu Ainoa izena?".

"Ez dute ulertzen han euskal kulturan murgilduta gaudela buru-belarri, nahiz eta argentinarrak izan. Hemen ez dakite iaz Buenos Airesen Euskal Herriaren omenezko azoka egin zela eta jarduera andana izan zirela Buenos Aireseko kaleetan. Gauza handia izan zen, baita maila politikoan ere", gehitu du.

Informazioa sustatu beharra

Informazio falta horri konponbidea emateko bideak sustatzea eskatu du Ainoak. "Ez dakit zein den arazoa, informazioa ez dela heltzen edo hemengoek horren berri jakiteko interesik ez dutela, besterik gabe. Nik animatu nahi ditut deskubritzera Atlantikoz bestalde badagoela euskal kultura barne-barnetik sentitzen duen fan talde handi bat. Horren berri eman beharra dago, informazio hori guztia zabaldu behar dugu", amaitu du.