euskalkultura.eus

Parker, Colorado, AEB. Festa, urteroko euskal piknika, ospatuko dute Coloradoko (AEB) euskaldunek abuztuaren 10ean. Iazko jaian, Euskal Etxeko hamargarren urteurrena ospatze aldera, oroigarri berezia eman zioten Michael Matassa elkartearen sortzaileari. Aurtengo nobedadea, ostera, euskal produktuak erosteko aukera izango da, Barbot Etchepare Basque Imports enpresaren eskutik. Horrez gain, zozketa antolatuko dute, aurreko urteetan bezala, eta irabazleak, saldutako txartelen diruaren %50a eramango du etxera, gainontzekoa Euskal Etxearentzat izanik.

“Piknika dugu finantzatzeko iturri behinena”, esan du Petracek-ek. “Ateratzen dugun dirtuarekin kluba finantzatzen dugu epe labur eta ertainera dirua nahikoa bildu nahi genuke proiektu guretzat garrantzitsu batzuetan parte hartzeko eta, esaterako, Euskal Herritik hizlari zein musikariak ekartzerako orduan, NABOrekin eta inguruko euskal etxeekin elkar lanean sakonago aritzeko”.

'Mendiko Jaia', abuztuaren 10ean

Eguerdian hasi eta arratsaldeko 16:30ean bukatuko da 'Mendiko Jaia' lez bataiatu duten festa. "Coors garagardo enpresaren fabrika dagoen Lions Park-en izango da", Golden-en (Colorado), azaltzen du klubeko arduradunak. Superior Farms enpresak emandako 25-30 kilo inguru arkume eskainiko dituzte bazkaltzeko, bai eta oilaskoa, entsalada, gateau Basque eta gazta. Salt Lake City-ko Utah’ko Triskalariak dantza taldeak emanaldia eskainiko du baita ere: “Euskal Etxe txikitxoa da geure dantza taldea izateko eta beste klubetatik ekartzen ditugu”, argitzen du Petracek-ek, irribarrez.

Laurogei lagun inguru batu ziren iazko festara, presidentearen esanetan, eta “beste hainbeste espero ditugu aurten”. “Kaliforniako beste jaialdiekin alderatuta txikia da geurea baina ondo pasatzen dugu eta euskal kultura landu eta erakusteko aukera ederra da, euskaldunei eta ez euskaldunei”.