euskalkultura.eus

Erroma, Italia. Euskal kultura sustatzen darraite Erroman Associazione Culturale Euskara (ACE) eta UPTER unibertsitateko Dipartimento di Lingua e Cultura Basca sailak. Abenduan Settimana Basca euskal astearekin berotu zuten Erromako neguaren hasiera, eta oporretatik bueltan, bihar asteazkena Aperitivo Basco izeneko topaketa egingo dute Giufà liburudenda-kafetegian. Arratsaldeko zazpietatik landa Joseba Sarrionandiaren poemak irakurriko dituzte, ACEk eta UPTER-eko euskara sailak italierara itzulita.

Horrez gain, bi elkarteak buru belarri ari dira beraien ekimenak zabaltzen eta munduko euskaltzaleekin partekatzen. "Kultur ekitaldiak antolatzeak balore bikoitza du. Egitasmoa gertatzen den bitartean, kultur hedapena ematen da, ezagutza eta truke momentu intensoak eskainiz. Baina kultur ekitaldia ez da une horretan agortzen. Denboran luzatu ahal den oihartzuna izan ahal du, ekitaldian present ez zeuden pertsonengana eta guneetara zabalduz", azaldu dute.

Hori dela eta, www.euskara.it webgunean –hau da, Associazione Culturale Euskara eta UPTER Euskal Sailak sustatzen duten web orrian– zenbait jardueren emaitzak argitaratzen hasiak dira. Hasteko, Radiodramma proiektua, partaide italiarrak euskarazko irratsaio bat egiten jarri zituen kultur-laborategia. Bi bertsio jarri dira sarean: “Almost Blue” italianozko bertsioa eta “Ilun, ia ia ilun”, euskarazko bertsioa. Horrekin batera webgunean eskura daiteke ere proiektu honi buruz Radio 3 (RAI) irratiak egin zuen saioa, podcast moduan. 50 minutuko programa da eta bertan, Radiodrammaz gain, Euskanta proiektua ere hizpide dute. Zorionak!