euskalkultura.eus

Lima, Peru. Mendeurreneko ekitaldiak hil honetan zehar egingo dira nagusiki, eta uztailaren 21ean egingo da jarduera nagusia, Yurimaguasen. Hain zuzen ere, Peruko oihaneko herri hau izan zen duela mende bat herrialdera iritsi ziren pasiotarren lehen egoitza.

Halarik ere, urtean zehar beste ekimenik ere izango da eta 2014ko lehen hiru hilabetean amaituko dira Mendeurreneko jarduerak, Limako Pilarreko Amaren parrokian egingo den mezarekin.

Aurreneko gotzain pasiotarrak

Gaur meza emango da Monsinore Venancio Orbe Celestino Uriarte eta Monsinore Santos Iztueta Mendizabal gorpuzkien omenez. Eurak izan ziren Perura etorri ziren lehendabiziko apezpiku pasiotarrak. Bihar, Tarapototik Moyobambara eramango dira gorpuzkiak eta euren omenezko beste meza bat egin eta lur emango zaie herri honetako katedralean.

Igandean Mendeurreneko Irekiera eukaristia iragarri da Tapapotoko Morales Coliseoan, eta hilaren 26ean, igandean, Mendeurreneko Irekiera meza egingo da Limako Pilarreko Amaren parrokian. 

Yurimaguasen 

Uztailaren 21ean ekitaldi nagusia egingo da Yurimaguasen: Mendeurreneko Jubileuaren Ospakizuna, Mirarien Jaunaren Parrokian. Urtean zehar bestelako ekitaldi erlijiosoak izango dira ere Peruko beste zenbait parrokia pasiotarretan.

Horrez gain, Sinposio Pasiotar bat antolatuko da, eta Peruko Oihaneko Pasiotarrei buruzko erakusketa bat ere egingo da. Azkenik, 2014an Pasiotarren Aste Kulturak eta Erlijiosoa egingo da Tarapoton, Lamas-en eta Yurimaguas-en. 

Ekitaldiotara batzeko asmoa agertu dute Limako Arantzazuko Amaren Kofradiak eta Anaidiak,  Fondo Editorial de la Revista Oiga erakundearen sostenguarekin. Francisco Igartua Rovira kazetari euskal-perutarrak sortu zuen Oiga aldizkaria.