euskalkultura.eus

General Acha, Argentina. Ikasturte hasierarekin batera, ziklo berriaren aktibitateen zerrenda kaleratu du ‘Rincon Vasco’ izenarekin ezagunagoa den Gral. Acha-ko Euzko Txokoa-k. Proposamenak komunitate osoari daude zuzenduta, haur eta nerabeei bereziki. Kirol anitz irakatsiko dira aurten ere euskal etxeko instalazioetan, tartean patinaje artistikoa, saski-baloia, esku-baloia eta gimnasia; disziplina hauetaz gain, kirol hastapen saioak eskainiko dira 3 eta 5 urte bitarteko umeentzat.

Honekin lotuta, aipatu behar da 2012an erakundeak egindako lanei esker, urte osoan zehar garatu ahal izango direla igeriketa ikastaroak Euzko Etxea-ko igerileku klimatizatuan.

Pilota eta euskal dantzak

Euskal kirolei dagokienez, pilotak ere badu leku garrantzitsu bat instituzioaren ekintzen artean. Izan ere, pilotari talde polit batek jokatzen du euskal etxeko trinketean eta euren esku daude pilota eskolak -astearteetan eta ostegunetan, eguerdiko ordu 1:45tik ordu 2:45etara- eta barruko txapelketen antolaketa. Azken lehiaketa joan den asteburuan izan zen eta txapeldunak, Daniel Fernandez eta Fabio Garcia, lehenengo postuan, eta Banano Alcalde eta Marcelo Ziaurriz, bigarrenean.

Etxeko dantza taldea sortze aldera, euskal dantza eskolak ere ematen dira Euzko Txokoan. Aurtengo lehenengo klasea martxoaren 8an izango, goizeko 9:30etatik 10:30etara eta larunbatero burutuko dira, ordutegi horretan. Gonbitea edade guztietako dantzariei dago zuzenduta.  

Bukatzeko, eta 2014ari begira, lan handia izango dute Gral. Acha-ko euskal gizataldeko lagunek euskal etxearen eta herriaren mugak gaindituko dituzten bi jai prestatzeko. Alde batetik, Txahalaren Jai probintziala antolatuko dute aurten ere euren egoitza. Festa herrikoi honen 42. edizioa maiatzean izango da. Beste alde batetik, eta 49. urtebetetzearekin batera, 50. urteurreneko jaia antolatzen hasteko deialdia luzatu die euskal etxeak lagun eta kide guztiei. Informazio gehiago jasotzeko edota ideiak proposatzeko, Euzko Txokoa Facebook-en dago Centro Vasco Euzko Txokoa izenpean.