euskalkultura.eus

Paraná, Argentina. Udako oporraldia bukatuta martxoaren 2an egin du 'Presencia Vasca' saioak 2014ko denboraldiko lehenengo emanaldia. Federico Borras aurkezle, Paranan eta Argentinan ez ezik, Euskal Herrian ere izan zuen saioak oihartzun handia, internet eta teknologia berriei esker.

“Lehenengo emisioak ehundik gora mezu jaso zituen telefonoz zein sare sozialen bidez. Tartean Iparraldeko Benoit Etxeberri-ren deia jaso genuen eta airean jarri genuen, noski”, kontatu dio Urrundik euskal etxeko lehendakari ohi Federico Borrasek EuskalKultura.com-i.

Horretaz gain, eta ziklo berriari dagokionez, 'Presencia Vasca'ren egileak jakinarazi digu programak oro har aurreko urteetako estiloari jarraituko diola, baina berrikuntza batzuk baztertu gabe.  “Ohi bezala, betiko kolaboratzaile eta etxeko laguna den Mikel Ezkerroren editorialak izango ditugu; elkarrizketak ere egingo dizkiegu politika eta kultur arloetako izen handiko lagunei, hemengoei zein Euskal Herrikoei. Gure asmoa da orain arte egindako bidetik jarraitzea, esan nahi baita momentuko gaiak saihestu gabe eta ikuspegi pluralista eskainiz. Argentinako eta Paranako euskal gizataldeetako berriak ere emango ditugu eta nobedade moduan, bizpahiru minutuko testuak aurkeztuko ditugu euskaraz. Hezkuntzari bultzada bizkorragoa ematea da helburua”.

Beste alde batetik, eta nahiz eta data berez martxoaren 1a izan, apirilean ospatuko du saioak bere urteurrena, Urrundik euskal etxearen urtebetetzearekin batera. Hitzordua, apirilaren 13an finkatu da, eguerdian, Paranako El Circulo Hotelean.

Gogora dezagun 'Presencia Vasca' igandero emititzen dela, --martxoan goizeko 10etatik 11etara baina apiriletik aurrera 11etatik 12etara-- Radio Universidad-en (105.7 Mhz); bertakoak ez direnek ere badaukate saioa entzuteko aukera, internet bidez, irratiaren webgunetik: www.fmuniversidad.com. Programarekin kontaktatzeko, hauexek dira bideak: 0343 4347777 telefonoa, presenciavasca@gigared.com helbide elektronikoa eta “Presencia Vasca Paraná” Facebook-eko kontua.