euskalkultura.eus

Rocklin, AEB. Duela lau urte, 2010ean, Kalifornia iparraldeko euskal etxe gazte honek akordioa lortu zuen NABO eta Gardnerville-ko kideekin: txanda hartuko zuten eta urte batean Gardnervillekoek eta hurrengoan eurak antolatuko zuten NABOren Kantari Eguna. Nevadako 'Mendiko Euskaldun Club'ekoak ados agertu ziren eta 2005ean sortutako Iparreko Ibarra kluba 'arduradunkide' hasi zen euskal kanten eguna zelebratzen.

“Guretzat, gure kulturari segida emateko beste xantza edo aukera bat da Kantari Eguna”, azaldu dio Goyhenetche-k buletin honi. 2014an, urriaren 11an ospatuko dute Iparreko Ibarreko hirugarren Kantari Eguna: “Oraindik programa ez dugu erabat zehaztua baina, gutxi gora-behera, badakigu zer nolakoa izango den eguna”.

Euskal abestien omenaldi honetara 300 lagun inguru batu ohi da eta horietatik hogeik oholtza gainetik abesten dute: “1988an txapelketa legez hasi zen baina berehala aldatu zuten, uste dut horrek jendeari atzeraka egiten ziola eta bigarren ediziotik euskal kantuen erakustaldi eta ongi pasatzeko eguna da”, diosku presidenteak. 

Datorren urriaren 11an, bertaratutako lagunek hamaika plan izango dituzte Rocklinen beren esku, kantuekin batera: mus txapelketa, euskal dantzak, bertsolariak, herri kirolak, jateko eta edatekoak eta Jean Flesher Band-en musikak alaitutako dantzaldia. Bakersfield-eko Mattin Etchamendy izango da aurkezlea aurten ere.

Baina hori ez da dena: “Valerie Arrechea, NABOko lehendakaria, Europan da eta haren berrien zain gaude Euskal Herriko musikariren bat ere gonbidatu gisa izango ote dugun jakiteko”, aipatzen du Goyhenetche-k. Aurrekoetan Mikel Markez eta Erramun Martikorena etorri izan dira Rocklin-era jaialdian parte hartzera.