euskalkultura.eus

Rosario, Argentina. 1979. urtetik egiten den Dakar (lehen Paris-Dakar) rallya Hego Amerikara iritsi zen 2009an. Kokapen berriarekin batera, paisaia zoragarriak eta baita arrisku handiko ibilbideak ere proposatzen zaizkie hemen ere partaideei. Berrehun bat gidarik hartzen dute parte proban, hainbat herritatik etorritakoak eta lau modalitatetan (auto, kamioi, moto eta kuadrizikloak) banatuta.

Aurtengoan, urtarrilaren 4an hasita, betiko arrakastarekin garatu zen txapelketa bi astetan zehar. Urtarrilaren 18an, Valparaisoko helmuga txiletarrera iritsi ziren korrikalariak, tartean Txomin Arana moto gidari bizkaitarra (Ereño, 1985). Arana ‘enduro’ moto kategoriako Euskal Herriko ordezkari bakarra izan da eta hori dela eta, lasterketa hasi aurretik harrera berezia egin zioten Rosarion bertoko euskaldunen ondorengoek. Zazpirak Bat euskal etxeko lagunek ‘erreki’ tipiko bat prestatu eta 'Euskaldun Hitza' (Palabra de Vasco) irrtsaioko Luis Maria Barrandeguyk eta Cristina Aguirrek elkarrizketatu zuten kirolari gaztea (elkarrizketa hemen).

[Euskaldun Hitza irratsaioko Cristina Aguirre eta Luis Maria Barrandeguy Txomin Aranarekin (argazkiaEE)]

Irratsaioko arduradunek adierazi bezala, “Hurbil-hurbiletik jarraitu genuen Rosario hiriko eta inguruko euskal gizataldearen kideok Txomin Arana Cobeaga-ren partaidetza aurtengo Dakarrean. Eta berak ere, nahiz eta denboraren aldetik oso larri ibili, taldeko beste batzuekin batera –Roberto mekanikaria eta Juanjo Bilbao, Gernika Off-Road klubeko arduraduna- gurekin eklkartzeko ahala egin zuen. Lasterketaren aurreko gauean euskal etxera etorri zen gurekin afaltzera, erlojuaren kontrako bisita batean, hurrengo egunean, goizeko 4:30etan atera behar baitzuen San Luisera, lasterketaren lehenengo zatia burutzeko. Ziur gaude Txominekin abiatu genuen kontaktua denboran luzatuko den harremana izango dela. Gisa honetako euskaldunek gure babesa izango dute beti, emaitzak edozein izanik ere”, segurtatu dute.

[Dakarreko zailtasun guztiak gainditu zituen moto gidari ereñarrak bere lehenengo esperientzia honetan (argazkia TA)]

Gogora dezagun Txomin Arana Gernika Off-Road Klubeko kidea dela eta 2014koa bere lehenengo esperientzia izan dela aurretik ere euskal partaidetik izan duen rally honetan. 174. zenbakia zeraman Yamaha bere motorrean, Arana 56. postuan sailkatu zen, Dakar bete duen lehenengo bizkaitarra bihurtuz.