euskalkultura.eus

Jose C. Paz, Argentina. Bertako euskal gizataldeak gonbidaturik, lagun anitz elkartuko dira datorren igandean Jose C. Paz-eko Altube Klubeko areto nagusian Toki Eder Euskal Etxearen urtebetetzea ospatzeko. Gonbidatuen zerrenda luzea da (berrehun inguru pertsona espero dira) eta hiriko agintari eta hainbat erakundetako buruzagiez gain, eskualdeko euskal etxeetako ordezkariek eta FEVAko batzordekide den Marta Abarrateguik ere hartuko dute parte. Bazkarian zehar, dantza eta musika ikuskizunak eskainiko dizkio Gure Talde Alaia etxeko dantza taldeak bertaratutako publikoari.

Urteurren festan baitan, gainera, eta Gure Esku Dago herri dinamikarekin bat egiteko, bideo bat filmatuko dutela anfitrioi eta gonbidatuek. “Durango eta Iruñearen artean Giza Katea egingo den egun berean, guk ere helduko diogu elkarri eskutik eta mezu bat bidaliko dugu Euskal Herrira”, jakinarazi digu Toki Eder-eko erreferente den Maria Angeles Oñederrak. Hitzordua, eguerdiko 12:30etan, Altube Klubean, eta bazkariko menua, paella.

Brasil 2014 Toki Eder-en

Beste alde batetik, eta Argentinan bizitzen ari den futbol giroan erabat murgilduta, Toki Eder-eko dantza taldeak proposamen polit bat du ekain-uztailerako. Gure Talde Alaia taldeko neska-mutilak arduratuko dira 2014ko Brasilgo Munduko Futbol Txapelketa-ko partidak proiektatzeaz eta askaria eskaintzeaz. “Bildutako dirua, Euskal Astera joateko gastuei aurre egiteko erabiliko dute gazteek”, azaldu dio Oñederrak EuskalKultura.com-i.

Eta betiko aktibitateekin ere jarraitzen du erakundeak. Mundiala bukatu eta gero, esaterako, Carlos Gabilondok aurkezten duen Zine Zikloarekin segituko dute. Horretaz gain, euskara eta dantza klaseak eta etxeko beste ekintzak, tartean Umeentzako Arte Plastikoak, Literatura tailerra, Sukaldaritza Tailerra eta Yoga klaseak ere daude abian etxeko instalazioetan.